نشرت المؤثرة رانيا إزميرالدا على حسابها الخاص على خاصية ستوري على أنستغرام رسالة حزينة لمحبيها :

“سلام عليكم انشالله تكونو بخير راهم يوصلوني بزاف رسايل ناس تسقسي عليا يقولولي طمنينا عليك شكرا يعطيكم الصحة

راني كيما حب ربي محنة صعيبة مازال مارانيش مستوعبة مازالت تحت الصدمة ، مازالت نكذب على روحي نقول راه مسافر دوك يولي ، مازالت مبحرة ما عرفتش وش ندير ما نقدر نهدر ما نقدر ندير خطوة في حاسة الدنيا ظلامت عليا

هو مات الله يرحمه وانا انطفيت ، جسد بلا روح حاولت نعاون روحي بجلسات عند طبيب النفسي و جلسات لازالة الصدمات ، راني نشرب حتى المههدئات والادوية باش نقدر نرقد ، باش نقدر نوقف باش نشوف في بنتي ، لكن اللهم لا اعتراض ، لي راني عايشاتو ما نتمناه لحتى واحد.

بالاك هذي راح تكون اخر ستوري مانيش قادرة نولي ونهدر خلاص كلش سماطلي كنت نشارككم فرحتي كنت صادقة في كلش معاكم ، امبعد كي راح سبب فرحتي وضحكتي مانيش حابة نوجعلكم قلبكم معايا وننشر لكم السلبية والله ما يهمني ارقام المتابعين والشي لي راهم يهدرو عليه ، نتمنى لوكان يولي الزمان للور ماندخلهمش ونعيش في سترة مع حب حياتي.

خلاصة القول راح نغيب حتى نتشافى من جرحي بالاك نرجع كاش نهار بالاك ما نرجعش ماتنساونيش برك من الدعاء لانني راني نتعذب فالدنيا .

الناس لي راهم ينشرو في فيديواتي القديمة وفاتحين حسابات مزيفة باسمي نقلكم حسبي الله ونعم الوكيل كما تدين تدان ، انا ني عايشة في عالم الحزن والاسى ماراني سامعة بمواقع التواصل بصح كما تدين تدان كيما راكم تقذفو فيا وضروني يجيبلكم ربي لي يضركم ويحطكم ربي في نفس الموقف وتعيشو نفس الشعور الدنيا قصيرة انا غسلت يديا من هذا الحياة في عايشة نسنا في موتي وفقط.

استودعتم الله ما تنساوش ادعو لزوجي حبيبي بالرحمة”